Адыгэ къэралыгъо университетым адыгэ филологиемрэ культурэмрэкIэ ифакультет адыгэ тарихъымрэ культурэмрэкIэ икафедрэ ипащэу, профессорэу, филологие шIэныгъэхэмкIэ докторэу Унэрэкъо Рае тыгъуасэ имэфэкI мафэ хигъэунэфыкIыгъ. АщкIэ иIофшIэгъухэр, студентхэр къыфэгушIуагъэх.
Адыгэ къэралыгъо университетым ипроректорэу ШъхьакIэмыкъо Рустам ректорым ыцIэкIэ Унэрэкъо Рае къыфэгушIуагъ. Лъэпкъ факультетым ипащэу Ахъмэт Джульеттэ, иIофшIэгъоу ХьакIэмыз Нуриет, студентэу Уджыхъу Айтэч шъхьэкIэфэныгъэшхо зэрэфашIырэр, щысэтехыпIэу зэряIэр къаIуагъ. Адыгэ культурэм, IорыIуатэм епхыгъэу ыугъоигъэхэм мэхьанэ ин зэряIэр, адыгэ лъэпкъым ишъыпкъэу зэрэфэлажьэрэр къыхагъэщыгъ. Псауныгъэ пытэ иIэу джыри илъэс пчъагъэрэ ахэтынэу къыфаIуагъ.
Унэрэкъо Рае иIофшIагъэхэр Адыгеим имызакъоу Темыр Кавказым, Москва ыкIи Санкт-Петербург ащызэлъашIагъ.
— Мыщ фэдэ мафэр ары цIыфыр зыкIыщыIэр, тхьашъуегъэпсэу. Шъори гъогу кIыхьэ, гъогу дахэ къэшъукIунэу шъуфэсэIо. Адыгэ лъэпкъым ыбзэ, илитературэ, икультурэ хэхъоныгъэ егъэшIыгъэным мэхьанэшхо иI. Адыгэ IорIуатэр сищыIэныгъэ щыщ хъугъэ. Сыфай ныбжьыкIэу мы Iофым дэлажьэхэрэр нахьыбэ хъунэу, — къыIуагъ шIэныгъэлэжьым.
Лъэпкъ факультетым иаспирантэу, адыгэ тарихъымрэ культурэмрэкIэ икафедрэ иIофышIэ ныбжьыкIэу Хъуажъ Раситэ къызэрэтиIуагъэмкIэ, Унэрэкъо Рае адыгэ IорыIуатэр шIу ригъэлъэгъугъ ыкIи нахь игъэкIотыгъэу зэригъэшIэным къыфигъэущыгъ.
Унэрэкъо Рае имэфэкI мафэкIэ тэри тыфэгушIо, псауныгъэ пытэ иIэу джыри бэрэ къытхэтынэу тыфэлъаIо.
Делэкъо Анет
АМ
Comments
Post a Comment