Адыгэ Республикэм исамбистэу, Тэхъутэмыкъое спорт еджапIэу N 1-м зыщызыгъэсэрэ Наш Расул самбэмкIэ Дунаим изэнэкъокъоу Кипр щыкIорэм ичемпион хъугъэ. Ар Урысые Федерацием ихэшыпыкIыгъэ командэ хэт.
НыбжьыкIэхэм азыфагу щызэхащэгъэ зэнэкъокъум текIоныгъэр къыщыдэзыхыгъэ, Адыгеим ыцIэ дахэкIэ рязыгъэIогъэ спортменым фэгушIуагъ Аыгэ Республикэм и ЛIышъхьэу КъумпIыл Мурат.
— Къэралыгъо 35-мэ ябэнэкIо анахь лъэшхэр зэнэкъокъум хэлажьэх. Наш Расул дышъэ медалым къыфэкIоным фэшI плIэгъогогъо бэнагъэ, Азербайджан, Армением, Грузием ыкIи Монголием ялIыкIохэм къашIуихьыгъ ыкIи къытефэ шъыпкъэу килограмм 71-м нэс къэзыщэчыхэрэм якуп чемпион щыхъугъ. БэнакIом, ащ итренерхэм тафэгушIо. Расул игъэхъагъэхэм ахигъэхъонэу, джыри нахь лъэгэпIэ инхэм анэсынэу фэтэIо. УкъызэкIэмыкIу! — къащитхыгъ Адыгэ Республикэм и ЛIышъхьэ ичылагъо нэкIубгъохэм.
Наш Расул мыщ фэдэ текIоныгъэшхо къыдихыным яIахьышIу хэлъ ар зыгъэсэрэ тренерхэу Джарымэкъохэу Рустамрэ Азмэтрэ.
Comments
Post a Comment